Hyderabad Rains: హైదరాబాద్‌లో ఆదివారం రాత్రి కురిసిన కుండపోత వర్షం నగరాన్ని షేక్ చేసింది. క్లౌడ్‌బరస్ట్‌ స్థాయిలో కురిసిన వానతో ఫ్లాష్‌ఫ్లడ్స్‌ సంభవించి, కాలనీలు ముంపునకు గురయ్యాయి. ఈ వరద ఉధృతికి ముగ్గురు వ్యక్తులు నాలాల్లో కొట్టుకుపోయారు. దీంతో నగరంలో వర్ష బీభత్సం ఎంత తీవ్రంగా ఉందో అర్థమవుతోంది.
Hyderabad Rains: ఆసిఫ్‌నగర్ మాంగర్‌బస్తీలో మామ, అల్లుడు వరద ప్రవాహానికి కొట్టుకుపోయారు. ఈ ఘటనతో ప్రాంతంలో కలకలం రేగింది. హైడ్రా, జీహెచ్‌ఎంసీ బృందాలు మాంగర్‌బస్తీ నాలాలో గాలింపు చర్యలు చేపట్టాయి. అక్కడి పరిస్థితిని స్వయంగా హైడ్రా కమిషనర్‌, తహశీల్దార్‌లు పరిశీలించారు.
ఇది కూడా చదవండి: UPI Rule Change: నేటి నుండి యూపీఐ లావాదేవీల పరిమితి ₹10 లక్షలకు పెంపు!
తహశీల్దార్ జ్యోతి మాట్లాడుతూ – “మాంగర్‌బస్తీ వాసులను తరలించేందుకు అనేకసార్లు ప్రయత్నించాం. ఇందిరమ్మ ఇళ్లు కూడా కేటాయిస్తామని చెప్పాం. కానీ ఎన్నిసార్లు నోటీసులు ఇచ్చినా వారు ఖాళీ చేయలేదు” అని తెలిపారు.
మాంగర్‌బస్తీలో సుమారు 1,500 ఇళ్లు ఉన్నాయి. వీటిలో చాలా ఇళ్లు నాలాపైనే లేదా నాలాకు ఆనుకొని నిర్మించబడ్డాయి. సుమారు 10వేల మందికి పైగా ఇక్కడ నివసిస్తున్నారు. మహారాష్ట్ర నుంచి వలస వచ్చిన ఈ వాసులు వందేళ్లుగా ఇక్కడే ఉంటున్నామని చెబుతున్నారు. అయితే, నాలాలో ఇద్దరు కొట్టుకుపోవడంతో కుటుంబ సభ్యులు తీవ్ర ఆవేదన వ్యక్తం చేస్తున్నారు.
ఇక ముషీరాబాద్‌లోని వినోభానగర్‌కు చెందిన దినేశ్‌ (23) భారీవానలో మోటార్‌సైకిల్‌తో సహా కొట్టుకుపోయాడు. ప్రైవేట్ ఉద్యోగం చేస్తున్న దినేశ్‌కు భార్య, కుమారుడు ఉన్నారు. అతని కోసం కూడా జీహెచ్‌ఎంసీ, హైడ్రా బృందాలు శోధన కొనసాగిస్తున్నాయి.
హైదరాబాద్‌లో ఒక్క వానతోనే నగర పరిస్థితి ఎలా కుదేలవుతోందో ఈ ఘటనలు మరోసారి రుజువు చేశాయి. వర్షం కారణంగా మరిన్ని ప్రాణనష్టం జరగకుండా అధికారులు అప్రమత్తంగా గాలింపు, సహాయక చర్యలు చేపడుతున్నారు.