Asia Cup 2025: క్రికెట్ అభిమానుల దృష్టి మొత్తం ఇప్పుడు ఆసియా కప్ 2025 కోసం భారత జట్టు ఎంపికపై కేంద్రీకృతమైంది. ఆగస్టు 19న అజిత్ అగార్కర్ నేతృత్వంలోని సెలెక్షన్ కమిటీ సమావేశం కానున్న తరుణంలో, మాజీ క్రికెటర్ ఆకాశ్ చోప్రా కొన్ని కీలక వ్యాఖ్యలు చేశారు.
Asia Cup 2025: సెప్టెంబర్ 9 నుంచి యూఏఈలో ప్రారంభమయ్యే ఈ టోర్నీ కోసం ఎంపిక కఠినంగా మారిందని ఆయన అన్నారు. ఓపెనింగ్ స్థానానికి సంబంధించి శుభ్‌మన్ గిల్ కంటే యశస్వి జైస్వాల్‌కు అవకాశాలు ఎక్కువగా ఉన్నాయని చోప్రా అభిప్రాయపడ్డారు.
మూడో ఓపెనర్ అవసరం
జట్టులో అభిషేక్ శర్మ, సంజు శాంసన్ వంటి ఓపెనర్లు మంచి ఫామ్‌లో ఉన్నప్పటికీ, మూడో ఓపెనర్ లేకపోవడం ఒక లోటు అని చోప్రా పేర్కొన్నారు. “ప్రపంచ కప్ దృష్ట్యా మూడో ఓపెనర్ అవసరం. ప్రస్తుత జట్టులో ఎవరైనా ఫామ్ కోల్పోతే ఆ ఖాళీని నింపడం కష్టం అవుతుంది” అని ఆయన వ్యాఖ్యానించారు.
జైస్వాల్ ఫిట్, గిల్ డౌట్
ఆకాశ్ చోప్రా విశ్లేషణ ప్రకారం, టీ20 ఫార్మాట్‌లో జైస్వాల్ ఆడే దూకుడు శైలి జట్టు అవసరాలకు బాగా సరిపోతుంది. మరోవైపు గిల్ క్లాసికల్ స్టైల్ ఉన్నప్పటికీ, ఆయనకు తుది జట్టులో స్థానం దక్కకపోవచ్చు. “గిల్‌ను మూడో ఓపెనర్‌గా తీసుకుంటే, టెస్ట్ కెప్టెన్, వన్డే వైస్ కెప్టెన్ అయిన అతను టీ20ల్లో బెంచ్‌పై కూర్చోవాల్సి రావచ్చు. ఇది జట్టుకు ఇబ్బందికరమవుతుంది” అని చోప్రా అన్నారు.
సెలెక్టర్ల ముందున్న సవాలు
జట్టులో ఇప్పటికే తిలక్ వర్మ, సూర్యకుమార్ యాదవ్, రింకూ సింగ్, హార్దిక్ పాండ్యా వంటి మిడిల్ ఆర్డర్ ప్లేయర్లు ఉన్నందున బ్యాటింగ్ స్థానాల సమస్య గిల్‌కు అడ్డంకిగా మారవచ్చని ఆయన విశ్లేషించారు.
ఇప్పుడు సెలెక్టర్ల ముందు గిల్, జైస్వాల్ మధ్య ఒకరిని మాత్రమే ఎంపిక చేయాల్సిన సవాలు ఉంది. ఇద్దరూ బలమైన ఆటగాళ్లే అయినప్పటికీ, ప్రస్తుత టీ20 జట్టు కూర్పు జైస్వాల్‌కు అనుకూలంగా ఉందని చోప్రా అభిప్రాయపడ్డారు.
ఆగస్టు 19న అధికారికంగా జట్టును ప్రకటించనున్నారు. ఈసారి కొన్ని సంచలన నిర్ణయాలు వెలువడే అవకాశం ఉందని అంచనా వేయబడుతోంది.