Crime News: విజయనగరం జిల్లాలో ఓ విషాదకర ఘటన చోటు చేసుకుంది. ప్రేమించి పెళ్లి చేసుకున్న నవదంపతులు కేవలం ఎనిమిది నెలల్లోనే అనుమానాస్పద పరిస్థితుల్లో మృతి చెందారు. ఈ ఘటన స్థానికులను, కుటుంబ సభ్యులను తీవ్ర విషాదంలో ముంచేసింది.
Crime News: కొత్తవలస మండలం తమ్మన్నమెరక సమీపంలోని కాలనీలో నివసిస్తున్న కొప్పుల చిరంజీవి (30), గీతల వెంకటలక్ష్మి (28) అనుమానాస్పదంగా మృతిచెందారు. చిరంజీవి ప్రైవేట్ కంపెనీలో అకౌంటెంట్‌గా పని చేస్తుండగా, వెంకటలక్ష్మి సమీపంలోని దుకాణంలో సేల్స్‌గర్ల్‌గా ఉద్యోగం చేసేది. ప్రేమించి, కుటుంబ సభ్యుల అంగీకారంతో వివాహం చేసుకున్న వీరు ఎప్పుడూ అన్యోన్యంగా ఉండేవారని బంధువులు చెబుతున్నారు.
సాధారణంగా ఉదయం లేవగానే పనుల కోసం వెళ్ళే ఈ దంపతులు 23వ తేదీ ఉదయం కనిపించకపోవడంతో స్థానికులు అనుమానం వ్యక్తం చేశారు. కిటికీ తలుపు తెరిచి చూడగా.. భయానక దృశ్యం కనబడింది. వెంకటలక్ష్మి నేలపై విగతజీవిగా ఉండగా, చిరంజీవి ఫ్యానుకు ఉరేసుకుని వేలాడుతూ కనిపించాడు.
స్థానికుల సమాచారంతో పోలీసులు అక్కడికి చేరుకుని పరిశీలించారు. మృతదేహాలను పోస్టుమార్టం కోసం ఆసుపత్రికి తరలించారు. సంఘటనా స్థలంలో ఎటువంటి ఆయుధాలు, గాయాల ఆనవాళ్లు కనబడలేదు. అయినప్పటికీ, ఆత్మహత్యా? లేక హత్యా? అన్న అనుమానాలపై పోలీసులు అన్ని కోణాల్లో విచారణ చేస్తున్నారు.
అనుమానాలు, ప్రశ్నలు
- చిరంజీవి వెంకటలక్ష్మిని హత్య చేసి అనంతరం ఆత్మహత్య చేసుకున్నాడా?
- లేక వెంకటలక్ష్మి ఆత్మహత్య చేసుకోవడంతో మానసికంగా కుంగిపోయిన చిరంజీవి కూడా ఉరేసుకున్నాడా?
ఈ ప్రశ్నలకు సమాధానం పోస్టుమార్టం రిపోర్టు వచ్చిన తర్వాతే తెలిసే అవకాశం ఉందని పోలీసులు తెలిపారు.
ఒకరికొకరు తోడుగా, జీవితాంతం సంతోషంగా ఉండాలని కలలు కనుకున్న ఈ దంపతుల మరణం అందరినీ ముంచెత్తింది. అకస్మాత్తుగా వారిని కోల్పోయిన కుటుంబ సభ్యులు కన్నీరు మున్నీరుగా విలపిస్తున్నారు.
