Income Tax Rules: మనలో చాలా మందికి ఒక సందేహం ఉంటుంది – ఇంట్లో పెద్ద మొత్తంలో నగదు ఉంచుకోవడం చట్టవిరుద్ధమా? ఆదాయపు పన్ను శాఖ (Income Tax Dept) ఏమైనా గరిష్ట పరిమితి విధించిందా? అనేది అందరికీ తెలుసుకోవాలనిపించే విషయం.
Income Tax Rules: ఇంట్లో నగదు ఉంచుకోవడానికి చట్టంలో ఎలాంటి పరిమితి లేదు. అంటే మీరు ఎంత మొత్తం అయినా ఉంచుకోవచ్చు. కానీ ముఖ్యమైన షరతు – ఆ డబ్బు చట్టబద్ధంగా సంపాదించబడాలి. మీరు సంపాదించిన ఆదాయానికి సరిపడే విధంగా పన్నులు చెల్లించి ఉండాలి. అదేవిధంగా ఆ వివరాలు మీ ఆదాయపు పన్ను రిటర్న్స్ (ITR)లో చూపించాలి.
ఒక వేళ ఐటీ అధికారులు రైడ్స్ నిర్వహించినప్పుడు మీ వద్ద ఉన్న నగదు మూలాన్ని మీరు నిరూపించలేకపోతే, ఆ డబ్బును వివరించలేని ఆదాయం (Unaccounted Income)గా పరిగణిస్తారు. ఆదాయపు పన్ను చట్టంలోని సెక్షన్లు 68 నుండి 69B వరకు ఈ అంశాలను స్పష్టంగా పేర్కొంటాయి. ఈ పరిస్థితుల్లో 78 శాతం వరకు పన్ను మరియు జరిమానా విధించబడే అవకాశం ఉంది.
డాక్యుమెంటేషన్ చాలా ముఖ్యం
చట్టంలో పరిమితి లేకపోయినా, మీ వద్ద ఉన్న పెద్ద మొత్తంలో నగదు అనుమానాలకు దారితీస్తుంది. అందువల్ల –
- జీతం లేదా వ్యాపార ఆదాయం ద్వారా వచ్చిందని నిరూపించే రికార్డులు ఉండాలి.
- వ్యాపారస్తులు అయితే క్యాష్‌బుక్‌లోని లెక్కలు ఖాతా పుస్తకాలతో సరిపోవాలి.
- ITR ఫైలింగ్‌లో సరిగ్గా వివరాలు నమోదు చేయాలి.
మన దేశంలో ఇంట్లో నగదు ఉంచుకోవడం చట్ట విరుద్ధం కాదు. కానీ డబ్బు నిజాయితీగా సంపాదించబడాలి, పారదర్శకంగా ప్రకటించాలి, అవసరమైనప్పుడు డాక్యుమెంట్లతో నిరూపించగలగాలి. అప్పుడు ఎంత మొత్తం ఉన్నా ఎలాంటి భయం ఉండదు.