Onam Sadya: కేరళలో ఓనం పండుగకు ప్రత్యేక ప్రాధాన్యం ఉంటుంది. ఈ పండగలో భాగంగా సాద్య అనే సంప్రదాయ విందు భోజనాన్ని ప్రత్యేకంగా తయారు చేస్తారు. ఇందులో అనేక రకాల వంటకాలను అరటాకులో వడ్డించడం ఆనవాయితీ. ఈసారి ఆ సంప్రదాయ విందు ప్రపంచ రికార్డులో చోటు దక్కించుకుంది.
Onam Sadya: కేరళలోని ఇరింజలకుడలో క్రైస్ట్‌ కాలేజీ విద్యార్థులు, ఉపాధ్యాయులు కలిసి 399 వంటకాలతో ఓనం సాద్యను సిద్ధం చేశారు. ఈ మహా విందుతో గిన్నిస్ బుక్ ఆఫ్ రికార్డ్స్‌లో పేరు నమోదు అయ్యింది. మొత్తం 204 మంది విద్యార్థులు, 11 మంది ఉపాధ్యాయులు ఈ విందు తయారీలో పాల్గొన్నారు.
ఈ కళాశాల గతంలో కూడా రికార్డులు సృష్టించింది. 2017లో 222 వంటకాలతో ఓనం సాద్య అందించగా, 2022లో 241 వంటకాలతో ఆసియా బుక్ ఆఫ్ రికార్డ్స్‌లో స్థానం సంపాదించింది. 2023లో 321 వంటకాలతో తమకే చెందిన రికార్డును బద్దలు కొట్టారు. ఈసారి మాత్రం 399 వంటకాలతో గిన్నిస్ రికార్డులో చోటు సంపాదించారు.
ఈ సాద్యలో 41 రకాల పాయసం, 67 రకాల తోరణం, 31 ఊరగాయలు, 33 చట్నీలు, 44 సైడ్ కర్రీలు, 20 సాల్టెడ్ వంటకాలు, 25 వేయించిన వంటలు, 19 స్వీట్లు ఉన్నాయి. అన్నీ బియ్యంతో కలిపి వడ్డించారు. విద్యార్థులు, ఉపాధ్యాయులు, తల్లిదండ్రులు, అతిథులు సహా 950 మందికి పైగా ఈ విందు రుచి చూశారు.
View this post on Instagram
ఇంత పెద్ద సాద్యను నిర్వహించడానికి చేసిన కృషిని నెటిజన్లు ప్రశంసిస్తున్నారు. దీనికి సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.