Dol Mela Accident: ఎగ్జిబిషన్‌ అంటే అందరికీ ఉత్సాహం, వినోదం. కుటుంబ సభ్యులతో కలిసి జెయింట్ వీల్‌, జూలాలు ఎక్కి సరదాగా గడపడం ఎవరికి నచ్చదు చెప్పండి? అయితే ఇలాంటి ఆటపాటల్లో కొన్నిసార్లు ఊహించని ఘటనలు చోటుచేసుకుంటే పరిస్థితి విషాదకరంగా మారుతుంది. రాజస్థాన్‌లో అలాంటి సంఘటన ఒకటి జరిగింది. జూలాలో ఊగుతూ సమతుల్యం కోల్పోయి పడిపోయిన యువతి ఘటన ఇప్పుడు సోషల్ మీడియాలో వైరల్ అవుతోంది.
Dol Mela Accident: రాజస్థాన్‌లోని బారాన్ నగరంలో నిన్న రాత్రి డోల్ మేళా సందడిగా జరిగింది. వేలాది మంది ప్రజలు కుటుంబ సభ్యులతో వచ్చి ఉత్సాహంగా గడిపారు. జెయింట్ వీల్‌, జూలాలు ఎక్కి చిన్నా పెద్దా అందరూ సరదాగా మునిగిపోయారు. ఇదే సమయంలో అనుకోని ప్రమాదం జరిగింది.
ఇది కూడా చదవండి: Emotional Couple: కంటతడి పెట్టించిన ఘటన.. ఒకే పాడేలో దంపతుల అంత్యక్రియలు!
జూలాలో ఊగుతున్న ఒక యువతి అకస్మాత్తుగా సమతుల్యం కోల్పోయి కింద పడిపోయింది. బోటు ఆకారంలో ఉన్న జూలా పైభాగానికి ఎగిరినప్పుడు ఆమె బ్యాలెన్స్‌ తప్పి కిందికి జారిపడింది. అంత ఎత్తు నుంచి బొమ్మను విసిరేసినట్లుగా నేలపై పడిపోవడం చూసి అక్కడి ప్రజలు షాక్‌కి గురయ్యారు.
ఆ యువతి కింద ఉన్న ట్యూబ్‌లైట్‌పై పడటంతో గాయాలు అయ్యాయి. ఒక్కసారిగా ఏమైందో అర్థం కాక అక్కడున్న ప్రజలు భయాందోళనకు లోనయ్యారు. అనంతరం స్థానికులు ఆమెను వెంటనే జిల్లా ఆసుపత్రికి తరలించారు. ప్రస్తుతం ఆ యువతికి చికిత్స అందుతోంది.
ఈ సంఘటనకు సంబంధించిన వీడియో సోషల్ మీడియాలో వైరల్ అవుతోంది. క్షణాల్లో జరిగిన ఈ ఘటనను చూసినవారు భద్రతా చర్యలపై ప్రశ్నలు లేవనెత్తుతున్నారు. మేళాలు, ఎగ్జిబిషన్‌లకు వెళ్లినప్పుడు ముఖ్యంగా పిల్లలు, యువతులు ఇలాంటి రైడ్స్‌ ఎక్కేటప్పుడు జాగ్రత్తలు తీసుకోవాల్సిన అవసరం ఉందని నెటిజన్లు కామెంట్లు చేస్తున్నారు.