Dubai Princess: దుబాయ్ పాలకుడు, యూఏఈ ప్రధాన మంత్రి షేక్ మొహమ్మద్ బిన్ రషీద్ అల్ మక్తౌమ్ కుమార్తె షేఖా మహ్రా మొహమ్మద్ రషీద్ అల్ మక్తౌమ్ నిశ్చితార్థం చేసుకున్నారు. ఆమెకు వరుడైనవారు ప్రముఖ రాపర్ ఫ్రెంచ్ మోంటానా. జూన్‌లో జరిగిన పారిస్ ఫ్యాషన్ వీక్ సందర్భంగా తమ సంబంధాన్ని అధికారికంగా చేసుకున్నారని మోంటానా ప్రతినిధి ధృవీకరించారు.
Dubai Princess: 31 ఏళ్ల షేఖా మహ్రా, 40 ఏళ్ల మోంటానా 2024 చివరి నుండి డేటింగ్‌లో ఉన్నారని సమాచారం. దుబాయ్‌లో మహ్రా అతిథ్యమిచ్చిన సమయంలో తీసుకున్న ఫోటోలను ఆమె స్వయంగా సోషల్ మీడియాలో పంచుకోవడంతో వారి సంబంధం చర్చనీయాంశమైంది. అప్పటి నుండి ఈ జంట తరచుగా దుబాయ్, మొరాకోలలో కనిపిస్తున్నారు. లగ్జరీ రెస్టారెంట్లలో భోజనం చేస్తూ, మసీదులను సందర్శిస్తూ, పారిస్‌లోని ప్రసిద్ధ పాంట్ డెస్ ఆర్ట్స్ వంతెన వెంట నడుస్తూ వీరిద్దరూ స్పాట్ అయ్యారు.
ఈ ఏడాది ప్రారంభంలో ఫ్రెంచ్ రాజధానిలో జరిగిన ఫ్యాషన్ ఈవెంట్లలో చేయి చేయి పట్టుకుని హాజరైనప్పుడు వీరి ప్రేమ బహిర్గతమైంది.
అయితే, ఈ నిశ్చితార్థం షేఖా మహ్రా గత వివాహం తర్వాత జరగడం ప్రత్యేకత. 2023 మేలో ఆమె షేక్ మానా బిన్ మొహమ్మద్ బిన్ రషీద్ బిన్ మనా అల్ మక్తౌమ్ను వివాహం చేసుకున్నారు. కానీ, ఆ వివాహం ఎక్కువకాలం నిలవలేదు. ఇన్‌స్టాగ్రామ్‌లోనే ఆమె విడాకులను ప్రకటించి సంచలనం సృష్టించారు.
“ప్రియమైన భర్త.. మీరు ఇతర సహచరులతో బిజీగా ఉన్నందున, నేను మన విడాకులను ప్రకటిస్తున్నాను. నేను మీకు విడాకులు ఇస్తున్నాను, నేను మీకు విడాకులు ఇస్తున్నాను, నేను మీకు విడాకులు ఇస్తున్నాను. జాగ్రత్తగా ఉండు. మీ మాజీ భార్య.” అని ఆమె చేసిన పోస్ట్ అప్పట్లో వైరల్ అయింది.
విడాకుల అనంతరం, షేఖా మహ్రా తన స్వంత బ్రాండ్ Mahra M1 కింద “డివోర్స్” అనే ప్రత్యేక పెర్ఫ్యూమ్ లైన్‌ను కూడా లాంచ్ చేశారు.