Karmanasa River: భారతదేశంలో నదులను పవిత్రంగా భావిస్తారు. చాలా ప్రాంతాల్లో నదులను దేవతలుగా కొలుస్తారు. పవిత్ర నదిలో స్నానం చేస్తే పాపాలు పోతాయని, శుభం కలుగుతుందని ప్రజల విశ్వాసం. కానీ, మన దేశంలో ఒక నది మాత్రం విరుద్ధంగా ఉంది. దాన్ని తాకడం, దాని నీళ్లు తాగడం, వంట చేయడానికి ఉపయోగించడం అన్నీ అశుభంగా భావిస్తారు. ఆ నది పేరు కర్మనాశ నది.
Karmanasa River: ఉత్తరప్రదేశ్ రాష్ట్రంలో ప్రవహించే ఈ కర్మనాశ నది, గంగానదికి ఉపనది. బీహార్‌లోని కైమూర్ జిల్లాలో పుట్టిన ఈ నది, ఉత్తరప్రదేశ్, బీహార్ గుండా ప్రవహించి చివరగా బక్సర్ సమీపంలో గంగలో కలుస్తుంది. ఈ నది బీహార్, ఉత్తరప్రదేశ్‌లకు సరిహద్దుగా నిలుస్తుంది. ఒక వైపు సోన్‌భద్ర, చందౌలి, వారణాసి, ఘాజీపూర్ జిల్లాలు ఉంటే, మరోవైపు బీహార్ ప్రాంతం ఉంటుంది.
కర్మనాశ అనే పేరుకే ఒక అర్థం ఉంది. “కర్మ” అంటే పనులు, “నాశ” అంటే విధ్వంసం. అంటే, ఈ నది నీటిని తాకితే శుభకార్యాలు, మీ అన్ని పనులు చెడిపోతాయని నమ్మకం. అందుకే, దాహంతో ఉన్నా కూడా ప్రజలు ఈ నీటిని తాగరని చెబుతారు. వంట చేయడానికి కూడా ఈ నది నీటిని ఉపయోగించరు.
ఈ నదిపై అనేక పురాణకథలు ఉన్నాయి. వాటిలో ఒకటి త్రిశంకు కథ. కథ ప్రకారం, రాజు హరిశ్చంద్ర తండ్రి సత్యవ్రతుడు తన శరీరంతో స్వర్గానికి వెళ్లాలని కోరుకున్నాడు. కానీ గురువు వశిష్ఠుడు తిరస్కరించగా, కోపంతో అతను విశ్వామిత్రుడి వద్దకు వెళ్ళాడు. విశ్వామిత్రుడు తన తపస్సుతో సత్యవ్రతుడిని శరీరంతో స్వర్గానికి పంపాడు. కానీ అతను మధ్యలోనే చిక్కుకున్నాడు. అప్పటి నుంచి అతనికి “త్రిశంకు” అనే పేరు వచ్చింది. ఈ కథతోనే కర్మనాశ నది అశుభకరమైనదిగా మారిందని నమ్ముతారు.
ఈ నది చుట్టూ ఉన్న ప్రజలు ఇప్పటికీ ఈ నది నీటిని తాకడానికి జంకుతారు. అందుకే దీనిని “శాపగ్రస్త నది”గా పరిగణిస్తారు.