Wasim Akram: భారత పేస్ సెన్సేషన్ జస్ప్రీత్ బుమ్రా ప్రస్తుత కాలంలో అత్యుత్తమ బౌలర్లలో ఒకడిగా నిలిచాడు. తన ప్రత్యేకమైన బౌలింగ్ యాక్షన్, అద్భుతమైన లైన్ & లెంగ్త్‌తో ప్రపంచవ్యాప్తంగా క్రికెట్ అభిమానులను ఆకట్టుకుంటున్నాడు. ఈ క్రమంలో చాలామంది అతనిని పాకిస్తాన్ లెజెండరీ పేసర్ వసీం అక్రంతో పోలుస్తూ వస్తున్నారు. అయితే, ఈ పోలికలపై స్వయంగా వసీం అక్రం స్పందించాడు.
జియో టీవీ షో హార్నా మనా హైలో వసీం అక్రం మాట్లాడుతూ –“జస్ప్రీత్ బుమ్రా ఒక అద్భుతమైన బౌలర్. అతడి బౌలింగ్ యాక్షన్ చాలా ప్రత్యేకం. అతని స్పీడు అద్భుతంగా ఉంటుంది. బీసీసీఐ అతని వర్క్‌లోడ్‌ను మేనేజ్ చేసిన తీరు కూడా ప్రశంసనీయం. కానీ, 90వ దశకం క్రికెట్‌ను ఇప్పటి క్రికెట్‌తో పోల్చడం సబబు కాదు. నేను లెఫ్ట్ ఆర్మ్ బౌలర్, అతను రైట్ ఆర్మ్ బౌలర్. ఇవన్నీ కేవలం సోషల్ మీడియా చర్చలు మాత్రమే. బుమ్రా తన కాలంలో గొప్ప బౌలర్‌గా పేరు సంపాదించాడు. నేను నా కాలంలో ఆడాను.” అని వ్యాఖ్యానించాడు.
గణాంకాలు ఏం చెబుతున్నాయి?
- వసీం అక్రం: 104 టెస్టుల్లో 414 వికెట్లు, 356 వన్డేల్లో 502 వికెట్లు.
- జస్ప్రీత్ బుమ్రా: ఇప్పటివరకు 48 టెస్టుల్లో 219 వికెట్లు (సగటు 19.82), 149 వన్డేలు, 82 టీ20 వికెట్లు.
ఈ గణాంకాల ప్రకారం, బుమ్రా చాలా వేగంగా క్రికెట్ చరిత్రలో అత్యుత్తమ బౌలర్ల జాబితాలో స్థానం సంపాదిస్తున్నాడని నిపుణులు అభిప్రాయపడుతున్నారు.
భారత మాజీ పేసర్ వరుణ్ ఆరోన్ మాట్లాడుతూ – “బుమ్రాను జీనియస్ అనడం కూడా తక్కువే. అతను SENA దేశాల్లో (దక్షిణాఫ్రికా, ఇంగ్లాండ్, న్యూజిలాండ్, ఆస్ట్రేలియా) వసీం అక్రం కంటే ఎక్కువ వికెట్లు తీశాడు. ఇది అతని సామర్థ్యాన్ని నిరూపిస్తుంది. అక్రం తన కాలంలో లెజెండ్. కానీ బుమ్రా కూడా కనీసం అదే స్థాయిలో ఉన్నాడు.” అని ప్రశంసించాడు.
దీర్ఘకాలం తర్వాత బుమ్రా మళ్లీ ఆసియా కప్ 2025లో మైదానంలోకి అడుగుపెట్టనున్నాడు. యూఏఈలో జరిగే ఈ టోర్నీలో అతను టీమిండియా పేస్ దళానికి నాయకత్వం వహించనున్నాడు.