Teachers Day 2025: చదువు చెప్పడం ఒక వృత్తి మాత్రమే కాదు.. భవిష్యత్తు తరాలను తీర్చిదిద్దే ఒక గొప్ప బాధ్యత. అలాంటి బాధ్యతను అంకితభావంతో నిర్వర్తిస్తూ, వేలాది మందికి స్ఫూర్తిగా నిలుస్తున్న ఉపాధ్యాయుడు కేరళలో ఉన్నారు. అబ్దుల్ మాలిక్ అనే ఈ గణిత ఉపాధ్యాయుడు, గత 20 ఏళ్లుగా ప్రతిరోజూ నదిని ఈదుతూ పాఠశాలకు చేరుకుంటున్నారు.
Teachers Day 2025: మలప్పురం జిల్లాలోని పడింజట్టుమురి గ్రామానికి చెందిన మాలిక్, ముస్లిం లోయర్ ప్రైమరీ స్కూల్‌లో గణితాన్ని బోధిస్తున్నారు. రోడ్డు మార్గం ద్వారా వెళ్తే 12 కిలోమీటర్ల ప్రయాణం అవసరం. అందుకే ప్రతిరోజూ ఉదయం పుస్తకాలు, దుస్తులు, భోజనం అన్నీ ఒక ప్లాస్టిక్ సంచిలో సర్ది, టైర్ ట్యూబ్‌కు కట్టి నదిని ఈదుతారు. వర్షాకాలంలో కూడా ఈ సాధన కొనసాగుతూనే ఉంది.
1994 నుంచి ఒక్కరోజు కూడా సెలవు తీసుకోని మాలిక్, విద్యపై ఎంతటి నిబద్ధత కలిగిఉన్నారో ఇది చాటి చెబుతోంది. ఆయన విద్యార్థులు ప్రేమగా “ట్యూబ్ మాస్టర్” అని పిలుస్తారు.
కేవలం బోధనలోనే కాకుండా, పర్యావరణ పరిరక్షణలోనూ మాలిక్ ఒక ఆదర్శప్రాయుడు. తరచూ తన విద్యార్థులతో కలిసి నదిని శుభ్రపరిచే కార్యక్రమాలు నిర్వహిస్తారు. ప్లాస్టిక్ వ్యర్థాలు, శిధిలాలను సేకరించి, ప్రకృతిని సంరక్షించేందుకు కృషి చేస్తున్నారు. అంతేకాదు, 10 ఏళ్లు పైబడిన విద్యార్థులకు ఈత నేర్పుతూ, శారీరక ధృడత్వాన్ని పెంచుతున్నారు.
స్థానిక విద్యాశాఖ అధికారులు కూడా మాలిక్ సేవలను అభినందించారు. విద్యాశాఖ అధికారి ఎస్. రాజీవ్ మాట్లాడుతూ – “మాలిక్ సర్ బోధన పట్ల అంకితభావానికి మాత్రమే కాదు, పర్యావరణ పట్ల ఆయన క్రియాశీలతకు కూడా ఆదర్శప్రాయుడు. ఆయన నిజమైన టీచర్ స్పూర్తి” అని అన్నారు.
అబ్దుల్ మాలిక్ కథ, గురువుల పట్ల ఉన్న గౌరవాన్ని మళ్లీ గుర్తు చేస్తూ, “టీచర్స్ డే” సందర్భంగా దేశవ్యాప్తంగా ఉపాధ్యాయులకు ఒక స్ఫూర్తి వనరుగా నిలుస్తోంది.