Vande Bharat: భారతీయ రైల్వే వందే భారత్ ఎక్స్‌ప్రెస్ ప్రయాణికులకు కీలక సౌకర్యాన్ని అందుబాటులోకి తీసుకొచ్చింది. ఇకపై రైలు బయలుదేరే 15 నిమిషాల ముందు వరకు కూడా టిక్కెట్లు బుక్ చేసుకోవచ్చు. ఈ నిర్ణయంతో చివరి నిమిషంలో ప్రయాణించాల్సిన వారికి పెద్ద సౌలభ్యం లభించనుంది.
Vande Bharat: దక్షిణ రైల్వే జోన్ పరిధిలో నడుస్తున్న ఎనిమిది వందే భారత్ ఎక్స్‌ప్రెస్ రైళ్లలో ఈ సదుపాయం అమల్లోకి వచ్చింది. ఈ మార్పు వల్ల రైలు ప్రారంభ స్టేషన్ నుండి బయలుదేరిన తర్వాత కూడా ఖాళీగా ఉండే సీట్లు సమర్థంగా వినియోగం కానున్నాయి.
ప్రస్తుతం ఈ సదుపాయం తమిళనాడు, కేరళ, కర్ణాటక, ఆంధ్రప్రదేశ్ రాష్ట్రాల్లో నడుస్తున్న రైళ్లకు వర్తిస్తోంది. వాటిలో మంగళూరు – తిరువనంతపురం, చెన్నై – నాగర్‌కోయిల్, కోయంబత్తూర్ – బెంగళూరు, మధురై – బెంగళూరు, చెన్నై – విజయవాడ మార్గాల వందే భారత్ రైళ్లు ఉన్నాయి.
ఇక మార్గమధ్య స్టేషన్ల నుండి ఎక్కే ప్రయాణికులు కూడా చివరి నిమిషం వరకు టికెట్ బుక్ చేసుకోవచ్చు. ఇందుకోసం భారతీయ రైల్వే తన ప్యాసింజర్ రిజర్వేషన్ సిస్టమ్ (PRS) ను అప్‌డేట్ చేసింది.
టికెట్ బుకింగ్ విధానం:
- IRCTC వెబ్‌సైట్ లేదా యాప్ (www.irctc.co.in) లో లాగిన్ అవ్వాలి.
- బోర్డింగ్, గమ్యస్థానం, ప్రయాణ తేదీ వివరాలు ఎంచుకోవాలి.
- సిస్టమ్ రియల్ టైమ్‌లో ఖాళీ సీట్లను చూపుతుంది.
- ఎగ్జిక్యూటివ్ క్లాస్ లేదా చైర్ కార్ ఎంచుకోవాలి.
- ఆన్‌లైన్ పేమెంట్ పూర్తి చేసిన వెంటనే SMS, ఇమెయిల్ ద్వారా ఇ-టికెట్ వస్తుంది.
ఈ కొత్త సౌకర్యంతో వందే భారత్ ఎక్స్‌ప్రెస్ ప్రయాణం మరింత సులభం అవుతుందని రైల్వే అధికారులు తెలిపారు.